Það hefur skelfilega lítið verið bloggað hérna undanfarið.  Þetta ku víst vera fyrsta blogg ársins!   Það er svosem ekkert mikið að ske hérna, annað en þetta vnejulega, vinna, borða, sofa, þannig að lífið hérna hefur kannski ekki gefið okkur mikið tilefni til bloggs.  

Það er nú engin breiting á því núna, þó svo að þessar línur birtast hér nú.... og ef til vill einhverjir sem velta því fyrir sér, hvers vegna í ósköpunum við erum að halda úti þessarri síðu.   Svarið við því er aðallega á nördíska vísu... þetta er jú bloggað á kerfi sem smíðað er af undirritaðri og er einfaldlega notað til prófanna og ýmiskonar tilrauna sem gætu komið viðskiptavinum til góðs. 

En nóg um það í bili....  Ljósmyndunnar dellan hefur síðustu mánuði tekið undirritaða heljargreipum og var nú dellan þó nokkur fyrir.  Síðan í desember á síðastliðu ári hef ég verið að taka þátt í sérstöku mynd-á-dag verkefni.   Menn gera þetta á marga vegu.... oftast er bara tekin mynd af einhverju skemmtilegu, ein á dag og svo myndin sent á Flickr....  Sum þessarra verkefna ganga líka út á það að taka sjálfsmyndir.  Verkefnið sem ég skráði mig á gengur hins vegar út á myndir af börnum.   

Ég lagði ekki út í að taka mynd á dag af öllum mínum, sérstaklega þar sem sum þeirra eiga það til að hlaupa í burtu ef þau sjá myndavélar.  Þess vegna valdi ég að taka bara myndir Önnu og Arnbjörgu.  

Hann Stefán var einn þeirra sem ekki vildu láta taka mynd af sér þegar ég byrjaði á verkefninu.   Á því hefur þó orðið allnokkur breiting... og má með sanni segja að nú, þegar þessi orð eru skrifuð, er mun auðveldara að taka myndir af honum en systrum hans.  Hann er jafnvel að gefa Önnu góða punkta í sambandi við pósur og annað í myndatökunni. 

Hér eru allir liggjandi í leti, með skál af nammi sér við hlið.  Það er bara eins og það á að vera, er það ekki?  Við vonum að allir sem  þetta lesa eigi gleðileg jól og óskum öllum jafnframt hamingju og farsældar á komandi ári...

Til þeirra sem áhuga hafa má geta þess að ljósmyndir frá okkur eru reglulega settar inn á Flickerinn okkar.

Hjörtur hefur störf á nýjum stað.

Hættur að smíða alla daga, og kominn í sparigallanum inn á Veðurstofu.

Hvað þar á að gera er ekki alveg ljóst, en vitað að það er tölvutengt á einhvern hátt, allavega er starfsheitið Kerfisstjóri.

Þetta bar allt afar brátt að. Í kringum 15 nóv hringdi síminn og var það tölvudeildarstjórinn að spyrja hvort karlinn væri til í að koma í vinnu hjá hinu opinbera. Fyrir sakir kulda og bleytu þann daginn var viljinn meiri en oft annars, og var samningum fram haldið næsta dag og síðan aftur fáeinum dögum síðar, sem leiddi af sér að samningar náðust.

Karlinn skellir sér svo í sparigallanum í vinnuna 3. des.

Nú lét karlinn verða af því og flotaði og flísalagði baðherbergið. Við skruppum í Byko og fundum svona ljómandi fallegar flísar. Þær voru bornar heim ásamt öllu tilheyrandi, og  byrjað að rífa allt út af baðinu.

Síðan hófst uppbyggingin. Fyrst þurfti að flota í gólfið til að jafna það út, og fylla upp í "fúgurnar" í munstursteypunni sem var á gólfinu.

Því næst tók við flísalögnin. Til eru ýmsar misauðveldar og fljótlegar aðferðir, og var að sjálfsögðu valið að fara þá erfiðustu og tímafrekustu. Árangurinn er sá að gólfið er nú hreinlega svakalega flott, allt lagt í 45° með slíkum skurði sem því fylgir.

Næst er síðan að parketleggja afganginn af neðri hæðinni. Það er svipað at, þarf bara meira af öllu, sérstaklega peningum.

Jæja, nú er búið að skíra hana Arnbjörgu.  Það lá auðvitað beinast við að gera það bara hérna heima í stofu. Hún var jú getin heima og fædd heima.  Nánustu ættingjar, langömmur, ömmur,afar, systkini foreldranna og þeirra börn voru viðstödd, og með heimillisfólkinu urðu þetta 50 manns.

Því miður gleymdi ég alveg að taka upp myndavélina og því á ég engar haldbærar ljósmyndir til að sýna.  Ég auglýsi því hér með eftir myndum að skírnarbarninu, og líka öðrum myndum úr veislunni.

Hún Marín okkar á afmæli í dag.  Núna er hún orðin 17 ára. Það er ótrúlegt því það er svo stutt síðan hún var bara oggolítil písl sem saug þumalputtann.

Til hamingju með afmælið elskan mín og haltu áfram að vera sama dúllan og þú hefur alltaf verið.

Nú er ég að vinna í því að uppfæra kerfið sem er á bak við vefrun.com.  Undirbúningurinn að þessu hefur tekið dágóðan tíma og skýrir líka bloggleysið hjá mér þar sem ekki var hægt að skrifa blogg á meðan.   Uppfærslunni er ekki alveg lokið ennþá en það verður gert eftir því sem tími vinnst til.  

 Í sumar festi ég kaup á léninu vefrun.net og mun það fá það hlutverk að birta svona yfirlit yfir það helsta sem er að gerast á vefjunum okkar.    ...en eins og allt annað þá  verður það bara að bíða þar til tími vinnst til.

Þetta verður stutt blogg í dag og aðal efnið er þessi mynd sem náðist af óhappi sem varð á flugeldasýningunni á Akureyri. Aðrar myndir koma seinna en þær eru því miður ekki komnar í hús þar sem myndavélin var tæmd á nýju fartölvuna hennar Marínar.